بصراحة حاجة تكسف . الناس اللي هم عندهم ثقة في كل حاجة إلا نفسهم ودول انتشروا بشكل كبير على الانترنت دول مهمتهم بسيطة أوي يدخلوا الانترنت ويشتركوا في منتدى ويروحو لمنتدى تاني ينسخووووووا أجدع موضوع فيه ويرجعوا للمنتدى اللي سجلوا فيه ويبدأوا يلصقوا والواحد منهم يكتب في آخر الموضع لا تنسونا من ردودكم أو كلمة شكر من الأعضاء تجعلني أزداد في العطاء الموضوع قرب يوصل للشحاته وبكرة حيطلع واحد منهم يقولك اللي يحب النبي يرد والله بيفكروني بمندوب المبيعات المتجول واللي عايزك تشتري منه أي حاجة . والغريب إنهم كتير أوي يعني لو واحد كتب موضوع بتلاقي ألف بينسخوا الموضوع يعني الموضوع مش بتاعه وعايز حقه كمان يعني لم يضيف أي شئ جديد بيفكروني بواقعة حقيقية حصلت لي من حوالي 15 سنة كنت أنا وواحد صاحبي رايحين مشوار لمدينة جنبنا وكنا مستعجلين جدا والوقت كان منتصف الليل والجو شتاء ومفيش عربيات فجأة لقينا قطار الساعة 12 قلنا الحمد لله فرجت ركبنا القطر واحنا فرحانين أوي ولما وصلنا المدينة القطار موقفش لأنه طلع سريع لا يقف إلا في رابع محطة واحنا كنا نازلين المحطة التانية المهم وصلنا المحطة الرابعة واحنا مش عارفين حنرجع إزاي بس الحمد لله بمجرد وصولنا لقينا قطار مقابل وبالفعل ركبنا القطار لكن هو كمان طلع سريع ولم يقف إلا في المحطة الأولى اللي ركبنا منها . الجماعة دول بأة نفس الحكاية وجودهم لا قيمة له فهم مستهلكين فقط وليس منهم أي فائدة للأعضاء وكل اللي يهمهم إن واحد يرد عليهم ويقول مشكور وهو قاعد فاضي كل اللي بيعمله انه يتابع التعليقات ويرد شاكر مرورك يا غالي ولو مفيش حد رد يرد هو ويقول ايه يا جماعة فين الردود والله حاجة تكسف بدل ما يحتسب الأجر والثواب عند الله وانه بيعمل عمل نيته منه الخير للناس لا هو عايز ردود لأنه شايف قيمته في الردود أنا عايز أقولهم كلمة واحدة بس
عيب اللي بتعملوه
الكاتب
عبدالسلام محمد
abdohusin1976@gmail.com
ليست هناك تعليقات:
إرسال تعليق